雅虎香港電視

【Now財經台】英國昨晚(15日)出咗通脹數據，2024年12月居民消費價格指數(CPI)按年升2.5%，扣除能源及食品嘅核心CPI就按年升3.2%，低過預期，如果睇返核心CPI走勢，英國通脹係咪已經受控？此外，英倫銀行將會喺2025年2月再議息，係咪好大機會按兵不動？

資深經濟師羅家聰表示，通脹短期上落同外圍關聯度好高，英國核心CPI按年升3.2%唔算受控，但大致上同其他地方睇齊。佢又認為，英國整體通脹走勢穩定，而補貼因素嘅影響，過年前後就會反映，加上通脹喺年初及年底通常都有異樣，所以要睇多幾個月再判斷通脹係咪受控。

KC續指，英倫銀行近幾年都係望住跟美國聯儲局調整利率，而英國通脹走勢及失業率都同美國一致，所以貨幣政策都唔希望同美國有分歧，所以當聯儲局暗示要放慢減息步伐時，相信英倫銀行都會跟，最多只會相差0.25厘，不過，聯儲局成日反口覆舌，所以有時都好難跟，亦不宜跟車太貼。