【Now財經台】市場憧憬聯儲局會扭曲操作遏債息升勢，但聯儲局主席鮑威爾噚晚發表嘅講話隻字不提，無法紓緩市場對債息搶高嘅憂慮。美股三大指數噚晚又跌，科技股再成跌市重災區，納指收市挫逾2%，今年嘅升幅更「化灰」。獨立股評人聶振邦認爲，「殺估值」風暴好大機會重臨，踏入2月，美國投資者開始轉戰傳統經濟股，加上不斷傳出負面消息，重創科技股。佢又話，納指已經喺高位調整超過10%，估計納指今個月會繼續跑輸道指。聶Sir建議，如果投資者揸住大量新經濟股，可能要套現，或換馬傳統經濟股。