雅虎香港電視

【Now財經台】內銀股近期強勢，主要係有派息憧憬，據中證銀行指數顯示，幾乎所有成分股今年都創過最少52周新高，內銀今個星期會陸續派成績表，到底會有驚喜還是驚嚇？此外，本周亦唔少重磅股出業績，包括美團(03690)及比亞迪股份(01211)等，而周四(29日)係期指結算日，恒生指數有冇機會衝上18000點？

星展銀行(香港)豐盛私人客戶執行董事鄧威信估計，內銀業績唔會有太大驚嚇或驚喜，因為內銀股業績透明度較高，唯一可能同市場預期有落差係呆壞帳撥備，因為依家經濟唔好，唔少內房陷財困，會直接影響內銀。至於內銀盈利增長，佢預期，將錄得輕微倒退或低單位數增長，又估計派息比率唔會有太大改變，即維持約30%。

恒指方面，Wilson就話，恒指有機會借業績挑戰18000關，但要留意近幾次恒指上到18000點就遇阻，除非今個星期出爐嘅業績好靚仔，又或者經濟數據好轉，但相信短期內都比較難有起色，因此，估計恒指上到18000點會有明顯阻力。