雅虎香港電視

【Now財經台】雖然美國1月消費物價指數(CPI)按年升幅放緩，但高過市場預期，據最新利率期貨顯示，聯儲局5月減息機會由數據公布前嘅61%，急降至36%，而超級核心通脹似乎有掉頭回升嘅勢頭，如果通脹真係仍未受控，短期內回落嘅機會係咪唔大？雖然市場預期今年係減息年，但睇返依家嘅情況，聯儲局今年會唔會仍未開始減息？

「股市漁夫」創辦人莊志雄指，可能係，甚至要掉頭加息，美國超級核心通脹按年升4.4%，按月升幅更加係2002年以來較高水平，但呢個已經唔計租金、能源及食品，但其實聯儲局已不斷搬龍門，連租金都剔除，但仍按年升4.4%，最大可能係美國人嘅通脹預期愈來愈高，因為實質收入增長已經跟唔上通脹升幅，工資係被蠶食。

Lewis又話，呢度仲未計過去兩個月航運價格不斷上漲，唔少航線升幅已超過100%，有研究機構指，當航運價格升1倍，會影響環球通脹0.7個百分點，如果運費全線升200%，會影響環球通脹1.5個百分點，如果紅海、巴拿馬等危機未解決，通脹係好難回落。