美國田納西州日前發生校園槍擊案，一名28歲槍手闖入納希維爾一間私立學校，槍殺6人之後被警方擊斃，警方今日公布，槍手生理性別係女性但自稱男性，係學校嘅舊生，懷疑不滿學校所以犯案。 槍手當日手持三支槍闖入校園，喺校內無差別掃射，警方接報之後4分鐘趕到現場，10分鐘後將槍手擊斃，事件入面有3名學生以及3名教職員喪生。 槍手犯案前曾經手寫宣言，表明會同警方對峙，又詳細畫出學校嘅地圖，槍手曾經係一名平面設計師，佢嘅老師好驚訝佢會做出依種事，話佢平常係一個安靜嘅人。