雅虎香港電視

【Now財經台】美國晶片巨企英偉達(Nvidia)將會喺周三(21日)美股收市後出業績，市場預期，集團上季每股盈利按年勁升7倍，Nvidia股價近期炒到飛起，業績後會唔會反高潮，還是人工智能(AI)熱潮可以帶挈股價繼續衝高？除咗「科技7雄」(Magnificent Seven)，最新又有「AI 5」，即Nvidia、微軟(Microsoft)、超微半導體(AMD)、台積電、高通(Qualcomm)，其實除咗炒到飛天嘅Nvidia，仲有邊隻可以睇高一線？

星展銀行(香港)豐盛私人客戶執行董事鄧威信表示，Nvidia呢份季績市場早已有充分預期，集團市盈率(PE)已升至逾70倍，其實已反映集團業績理想，反而要留意未來業績指引，如果差過市場預期，由於PE咁高，所以股價喺業績後有機會回套。

Wilson又指，睇返Microsoft業績，見到增長係比較穩定，雖然有好強嘅AI概念，但增長都唔係依賴AI業務，自2014年開始轉型至可持續收入後，不論毛利率及現金流一直keep得好好，估值又冇Nvidia咁誇張，長遠而言，Microsoft股價上升潛力喺AI 5之中較好。