【專家分析】金價繼續睇升

18,477 次觀看・1 個月前

【Now財經台】憧憬減息,加上受惠於中東局勢緊張等因素,金價一度衝破每盎司2300美元,仲不停挑戰新高,4月至今已累升逾3%,不過,昨晚(4日)有聯儲局官員指,今年可能未必減息,美股3大指數應聲下挫。聯儲局官員喺減息時間上多次「彈弓口」,一時「放鷹」,一時又話可能唔減,但地緣政局持續緊張,喺呢個情況下,金價會點走?

博威環球證券金融首席分析師聶振邦指,最近地緣政治變數多,尤其以色列喺停止攻擊加沙問題上再受壓,但以色列態度仍然強硬,更唔排除伊朗亦會有同等攻擊,令金價下周有機會進一步上升,佢估計,金價應可以企穩2300美元,後市可上望2330至2350美元水平。

聶Sir又話,投資者可以考慮部署油股、電力相關股及資源股,因為近期有色金屬股走勢唔錯,不過,過去幾周油價及金價能夠逆市升都係靠利好消息,由於隨時會出現變數,所以暫時只適宜做短線及小注部署,但由於油股息率高,如果想做中長線部署,可以揀返較穩陣嘅「三桶油」。