雅虎香港電視

【Now財經台】美團(03690)股價上周五(1日)抽升10%，雖然今日(4日)早段走勢反覆，但開市已重上90元。市傳美團擬出售美團優選社區團購新業務，雖然消息仍未證實，但摩根士丹利估計，美團股價上周五大升係市場憧憬公司有更進取嘅措施令美團優選虧損收窄，又指如果新業務明年可達至收支平衡，美團股價有14%潛在升幅，不過，大摩估計，新業務明年仍要蝕逾百億人仔，係咪真係咁快可以收支平衡？

博威環球證券金融首席分析師聶振邦認為，始終虧損金額唔細，所以投資者暫時都唔敢睇得太樂觀，未來要留意內地零售銷售可唔可以喺2025年扭虧為盈，加上依家唔少競爭對手喺本地生活範疇積極擴展，對美團嚟講競爭係比較激烈，相信新業務要虧轉盈都要時間確立，大摩之後可能都會更新睇法。

股價方面，聶Sir指，美團去年11月底公布業績時股價向下，裂口頂部喺100元，相信仍然係收復緊失地，有貨嘅投資者暫時可以睇98至100元，冇貨可以考慮90元以下先部署，防守性會較強。