雅虎香港電視

【Now財經台】據美國芝加哥商品交易所(CME)FedWatch最新顯示，聯儲局今年6月減息嘅機會升至71%，不過，今年有投票權官員轉肽，亞特蘭大聯儲銀行總裁博斯蒂克因(Raphael Bostic)基於通脹憂慮，預期聯儲局今年只減息兩次，少過市場預期嘅3次。

星展銀行(香港)豐盛私人客戶執行董事鄧威信指，市場暫時仍期望減息3次，但最大變數係來自服務業通脹，雖然美國整體通脹回落，但服務業通脹持續高企，黏性頗高，若服務業通脹進一步升溫，令局方覺得減息兩次已經足夠，到時市場就會調整投資布局，不過，今年減3次嘅機會仍然較大。

美股服務業嘅非必須消費品股上周五(22日)向下，其中，運動鞋生產商Nike股價急挫近7%，雖然集團季績勝預期，但預告上半年收入將錄得低單位數跌幅。鄧威信指，新興運動品牌受消費者追捧，市佔率急速上升，所以老牌生產商如Nike業績下滑，唔代表消費市場開始疲弱。