雅虎香港電視

【Now財經台】中國軟件國際(00354)噚晚出咗業績，去年少賺33%至7.59億人仔，值得留意係，公司中期賺5.7億人仔，即下半年賺唔夠2億人仔，都倒退得好急，究竟出咗咩問題？影響舊年毛利率嘅因素都消退，今年止跌回升嘅機會大唔大？

耀才證券研究部總監植耀輝指，市場對中軟呢份業績有啲驚訝，上半年表現唔差，盈利亦有增長，出業績前冇發過盈警，所以冇預期表現會咁差，由於對公司失望，所以就沽貨離場。

Stanley又指，去年對唔少行業嚟講都係最壞時間，唔少公司指舊年條數比較差係同疫情有關，但今年有復常概念，毛利率及盈利反彈都好合理。中軟提及要力谷毛利率較高嘅產業，但呢個範疇嘅競爭比較大，有機會未見其利，先見其害，因此，Stanley認為，中軟今年毛利率有機會回升，但賺唔賺到錢係另一回事，業績有冇機會反彈要再觀察。