雅虎香港電視

【Now財經台】財政司司長陳茂波將於2月28日發表新一份《財政預算案》，佢早前已發咗預警，指下個財政年度或繼續錄得財赤，但指政府有信心用幾年時間就可以回復收支平衡，到底本港財政狀況係咪可以喺幾年內扭虧為盈？

思博資本高級合夥人張宗永指，唔係完全冇機會，但要謹慎看待呢個問題，本港出現財赤主要有兩個原因，首先係同中國經濟有關，內地經濟表現唔好對香港有好大影響，亦唔係香港可以影響到，因為中國經濟有自己嘅循環及調整，其次係地產有關，本港地產市道好受利率因素影響，市場預期，美國利息已見頂，聯儲局喺2024年有機會減息，地產市道喺低息環境下會有返少少生氣，到時賣地收入都應該有改善。

至於政府發債短期係咪可以紓緩本港財政壓力？張宗永指，相對於其他地區，香港依家嘅環境已經唔錯，發債仍有一定吸引力，政府呢幾年力谷零售債券市場，希望將部分藏富於民嘅財富能支持本港債務，但發債嘅先決條件係要維持健康嘅財政狀況。