【星級理財】小時炒明星相 大時投資古董 樊亦敏堪稱投資達人
354,650 次觀看
被封為「美魔女」的樊亦敏,幕前演出深受網民歡迎。今集佢上嚟【星級理財】,竟然同大家分享佢「師奶仔」嘅一面! 原來佢細細個試過賣文具和明星相賺零食錢,大個仲勁,物業、貨倉、股票、古董、陶瓷、汽車、畫、首飾和手袋通通都有涉獵,堪稱投資達人! 今集佢接受Yahoo訪問,講自己嘅投資觸覺係點由細培養。 首先佢講到第一次賺零食錢,竟然係求學時期,賣出一個自己用緊嘅Hello Kitty筆盒!佢話嗰時有個巴士型嘅Hello Kitty筆盒,同學見倒話好靚,佢就叫同學攞嘢嚟換,最終換倒自己好鍾意食嘅糖! 再大啲佢就試過賣明星相賺真錢。佢話當時好迷阿姐(汪明荃)和松哥(劉松仁),晚晚追《京華春夢》,迷到去舖頭買明星相,儲齊一套由汪明荃紮辮仔,到和劉松仁結婚嘅紅色造型照。然後有一日,又有同學仔話想要,佢就mark高個價賣俾同學! 到出嚟社會做事之後,有次佢去海外拍戲,帶嘅竟然唔係飽肚嘅罐頭乾糧,而係通⋯渠⋯粉!佢話嗰時做咗research,發現拍外影嘅地方幾偏僻,無咩資源,於是就估倒會有塞廁所嘅問題,於是大大嘅行李箱,放滿清潔用品、床單和通水管嘅嘢。當時工作人員仲話佢變態,唔帶食物反而帶清潔用品,點知過幾日,人人都拍佢門問佢攞通渠粉!於是佢又叫人攞嘢嚟換,最終豆豉鯪魚、護膚品乜都俾佢換倒番嚟! 佢話自己嘅投資觸覺全靠多學習、多研究。要清楚知道客源,並善用自己的資源。 最後樊亦敏仲分享咗佢嘅「星級理財小貼士」,就係投資方面千祈唔好貪心,要明白有啲嘢係無辦法賺盡嘅,自己要定一個目標,賺幾多就放手。 想睇樊亦敏分享佢嘅投資故事,千祈唔好錯過呢集【星級理財】!

Yahoo有權移除任何不符 規範服務條款(包括粗俗或鼓勵犯法)之留言。

  • C
    Chan
    香港人的炒賣惡習,自小已養成...
  • B
    Boyzone
    教懷人, 教懷細路, 就係嚟啲人, 炒炒賣賣, 不務正業
  • R
    Rabbit
    very smart! esp the 通⋯渠⋯粉, really seeing things that other people don't foresee! that's how people can win in investment!
熱門商品