雅虎香港電視

【Now財經台】噚晚公布全年業績嘅火幣科技(01611)轉賺1.41億元，亦係公司歷來表現最好嘅1年，不過，火幣股價今朝短暫衝高3%後，就掉頭向下，仲愈跌愈多，一度急挫逾21%，低見6.82元。

火幣年初一度比市場當係比特幣(Bitcoin)概念股咁炒，當時Bitcoin由30000美元水平一路炒到55000美元樓上，火幣股價亦喺短短個半月飆3倍，衝上29.55元嘅歷史高位，但好快就見頂回落。

火幣喺業績前已偷步炒上，以大陽燭一棍爆升54%，今日即市低位只係打回原形。

其實火幣只得一瓣業務關Bitcoin事，仲要係蝕緊錢，加上內地收緊虛幣監管後，火幣準備撤出內地，將總部搬去新加坡，對虛幣有興趣嘅投資者，不如諗下炒Bitcoin，回報可能好過炒呢啲概念股。