雅虎香港電視

【Now財經台】恒指上星期五出現一支小陽燭，點知大市未喘定，又不斷傳出壞消息。恒指今朝低開280點，其後跌幅不斷擴大，暫一度挫逾千點，曾低見23872點，創逾10個月新低。

除咗中國恒大(03333)危機進入關鍵一周，今朝本地地產股成另一個冧市重災區，市傳中央要求香港地產商要「守規矩」，幫手解決住屋問題，雖有消息話中央已經否認咗，但投資者睇返教育股、賭股呢啲「前科」，都係先行沽貨離場，而地產分類指數(HSNP)今朝曾大插逾1800點或逾6%，表現仲差過恒指，跌到逾5年低位。

一個又一個板塊冧落嚟，市場恐慌情緒急升溫，有「港版恐慌指數」之稱嘅恒指波幅指數(VHSI)，最新升到近30，係7月底大跌市以來最高水平。