【股市脈搏】李寧呢浸升浪未完照追?

【Now財經台】安踏體育(02020)營運數據好過預期,加上國家主席習近平指示要搞好冬奧,刺激體育用品股今朝一度逆市升,但之後倒跌,不過,李寧(02331)一直keep住有得升。

李寧高開逾3%後,升幅擴大,一度升逾6%,高見61.5元,創新高,之後升幅收窄,最新升唔夠1%,成交股數較過去100日同時段平均增約3倍。

李寧近年唔再公布季度營運數據,一般要喺8月嘅中期成績表先睇到,而安踏今年首季表現強勁,又獲高盛上調盈利預測及目標價,估計李寧上季表現都唔會差。

李寧股價用3月9日低位,同今朝即市高位計,已經累升50%,今朝更一度破頂,升穿60元,走勢好強勁,但RSI仲未到70,即係未算嚴重超買。