雅虎香港電視

【Now財經台】內地文化和旅遊部放寬旅遊防疫限制措施，帶挈旅遊相關股造好，其中同程旅行(00780)今朝高開逾3%後，升幅一度擴大至8%，高見17.38元。

內地文旅部發通告，指跨省旅遊唔再同風險區聯動管理，遊客有48小時核酸證明，就可以搭跨省交通工具，開展落地檢要求，引道遊客主動進行核酸檢測，但出入境團就仍未恢復。通知發布後，多個旅遊平台搜尋量隨即急升，同程旅行平台嘅旅行團搜尋量升超過6倍。

憧憬內地旅遊業復甦，同程旅行股價由10月底低位11.62元，累計抽升逾50%，今日更升穿所有移動平均線，但喺17.4元嘅阻力位開始有獲利盤。受疫情影響，集團第2季業績由盈轉虧，但內地疫情喺7月至9月緩和，要留意公司下周二(22日)公布嘅第3季業績按季有冇改善。