雅虎香港電視

【Now財經台】英國減稅方案大逆轉，首相卓慧思棄車保帥後，新財相侯俊偉噚晚公布中期財政報告方案，幾乎撤銷晒迷你預算案所有減稅措施，英國債市及英鎊反應正面，其中英鎊一度升穿1.14兌1美元。《金融時報》最新引述消息指，英倫銀行或再推遲量化緊縮政策，消息一出，英鎊先升後倒跌，最新回落至1.131。

資深外匯分析師陳欣指，侯俊偉嘅政策主要係穩市場信心，但要留意，佢只係解決咗近期發生嘅問題，唔係本身已存在嘅問題，例如高通脹、能源危機及經濟增長放緩等，因此，英鎊想繼續反彈係較難，雖然英鎊過去1個星期嘅反彈力度及幅度的確唔錯，但向下趨勢未變，如果升至1.18亦可以企得穩，先可以扭轉下跌趨勢，否則，要留意守唔守得住1.1，甚至要下試1.05水平。