政府會喺今個月30號取消隔離措施，香港嘅防疫措施只會剩低口罩令以及學生需要快測，政府專家顧問劉宇隆今日話，可以分兩至三階段取消口罩令，2月底可以喺室外通風地方取消戴口罩，３月左右取消室內口罩令，之後醫院以及院舍就最後取消。 劉宇隆估計，取消口罩令之後，會出現流感以及新冠疫情反彈，個案維持喺2000宗或更低水平，但唔會有後口罩海嘯。 佢又認為，如果無出現大型爆發，可以取消師生快測嘅措施，過關亦可以用快測取代核酸。