雅虎香港電視

【Now財經台】美國聯儲局一如預期放慢加息步伐，今次會議僅加息0.5厘，而噚晚出爐嘅零售銷售數據又錄得近1年最大跌幅，11月製造業產值約半年以來首度下滑，加上英倫銀行及歐洲央行議息後，都表明加息周期會比較長，拖累美股3大指數噚晚急挫。

華盛証券分析師聶振邦指，美股近日因為當地經濟數據不似如期，雖然11月有感恩節傳統零售旺季，但零售數據仍表現欠佳，反映美國人寧願留返多啲現金備用，加上市傳多家大型企業正大規模裁員，種種消息都似乎反映美國經濟明年難逃衰退一劫。

科技股成噚晚跌市重災區，即使中概股審計傳來好消息，美國上市公司會計監督委員會(PCAOB)確認，獲得對中概股審計底稿充分檢查權限，不過，聶Sir認為，呢個消息影響唔大，中概股仍會跟隨大市上落，因為喺加息環境下，唔少中資科技股嘅融資成本上升，繼而影響盈利表現。