【Now財經台】今個星期迎來「超級央行周」，美國聯儲局、歐洲央行及英倫銀行都會議息，其中聯儲局內部已有共識放慢加息步伐，市場預期今個星期只會加息0.25厘，但高息會維持一段較長時間，依家市場同聯儲局最大分歧係終極利率目標差距大，主席鮑威爾會唔會繼續「放鷹」？今次議息有咩重點要留意？ 高富金融集團投資總監梁偉民指，睇返最新利率期貨，市場仍認為好大機會加息0.25厘，加0.5厘嘅機會唔夠5%，原因係美國通脹持續回落，令聯儲局有空間放慢加息步伐。Wyman又話，3月仍有可能再加息，雖然通脹持續降溫，但月初公布嘅消費物價指數(CPI)升幅仍超過6%，升幅一日未回落至5%或以下，仍未可以放心，佢估計，聯儲局要到5月、6月先有望停止加息。