雅虎香港電視

【Now財經台】美國聯儲局一如預期加息0.75厘，加上主席鮑威爾強調美國經濟冇陷入衰退，刺激美股噚晚大升，大市過咗議息一關，今明兩晚仲要過GDP及PCE呢兩關，此外，亦要留意中美元首可能今日通話嘅結果，市場樂觀情緒會唔會好快逆轉。

東亞銀行財富管理部首席投資策略師李振豪指，投資者要關注議息、出GDP等嘅時間點，會唔會影響市場起伏，到時就會見到樂觀情緒放緩，市場對美國今晚出爐嘅GDP預測有分歧好大，有估計會錄得負增長，亦有分析預期升0.5%，由於鮑威爾唔認為美國經濟衰退，意味不論GDP數據好壞，官員都唔擔心，因此，GDP數據或令市場有啲起伏，但唔會構成長線影響，相信今晚公布嘅數據，影響會比預期細。

Frank又話，投資者可留意中美元首通話內容，會唔會涉及關稅，但相信整體會向好，反而雙方喺俄烏局勢、台海問題上有冇意見不合，先至係後市較大風險。