雅虎香港電視

【Now財經台】港股噚日喺美團(03690)及「股王」拖累下，兩連升斷纜，但收市企穩29100點樓上，美團今日收市後會出季績，但放榜前畀北水狂掟，噚日錄得逾10億元淨流出。

華盛証券證券分析師聶振邦指，北水沽貨會對美團今日股價表現有影響，但美股期貨唔錯，道指期貨升過百點，會有利港股今日表現，甚至對美團股價都會有幫助。

聶Sir又話，在港上市嘅科技股已積弱一段時間，再跌空間唔會太大，唔排除喺大市逐步回升下，大型科技股會成為吸納對象，並估計美團出完業績，消化晒壞消息後，股價有機會回升，後市有機會挑戰290元，甚至300元，已持貨1個月以上嘅投資者可以繼續觀望。