雅虎香港電視

【Now財經台】噚晚有幾間美國大銀行派咗季度成績表，高盛多賺5倍、摩根大通多賺4倍、富國銀行則多賺6倍，全部好過預期，但有分析指，呢幾間銀行嘅貸款不增反減，其中富國整體貸款按年跌15%。

恒生銀行私人銀行及信託服務主管陸庭龍指，隨著全球央行喺疫情下，不斷「印銀紙」穩定市場，令大量資金湧入金融市場，帶挈相關收益增加，但實體經濟就升得慢好多，但呢個係正常嘅全球現象。

佢又話，金融股後市要視乎投資市場氣氛，消費金融、投資產品銷售收益，可能喺銀行未來主要收入來源，而大行參與上市、收購活動都有助增加收益。