雅虎香港電視

【Now財經台】百度(09888)股價噚晚喺美國再大冧14%，旗下愛奇藝亦再重挫13%，下星期一喺香港首掛嘅嗶哩嗶哩(B站，09626)，美國股價最新折合約742港元，低過香港招股價808元。

華盛証券分析師聶振邦指，抽到B站嘅「幸運兒」要睇返想做短線，還是中長線部署，短線而言，股價難免會受壓，因為呢段時間有好多有關中概股嘅敏感消息，喺美國上市嘅科技中概股持續被洗倉，更拖累美股表現，佢建議有貨嘅投資者，不論暗盤或者上市第一日升或跌都「走咗先」會比較適合。如果睇中長線，聶Sir話，B站業務基本面冇問題，而隨著用戶人數增加，睇好公司嘅前景，有貨可繼續持有。