【專家分析】台海局勢左右港股大局

【Now財經台】美國眾議院議長佩洛西已展開亞洲訪問行程,最新有消息指佢嘅專機已飛抵新加坡,而市場最關注係佢行程包唔包括台灣,以及台海局勢發展,亞洲股市今朝個別發展,恒生指數一度失守20000關,今個星期台海局勢係咪港股一大不明朗因素?

星展銀行(香港)豐盛私人客戶執行董事鄧威信指,台海局勢令市場神經緊張,估計市場會繼續關注佩洛西係咪會以私人名義或其他名義訪問台灣,依家雙方對峙情況都幾明顯,如果佩洛西真係到訪台灣,勢必會震撼市場。

Wilson估計,呢幾日股市難免會有啲沽壓,甚至整體波幅都會加劇,始終呢條係重要底線,一旦觸碰到,雙方嘅唇槍舌劍已足以令市場極度緊張及不安。