【專家分析】內房續冰封敏華頭痕

【Now財經台】敏華控股(01999)今日中午派咗中期成績表,期內多賺32%,收入就增長近51%,中期息較去年同期增30%,之前有唔少分析擔心原材料價格、貨櫃運費急升,加上内房問題會拖累敏華盈利,但今次呢份成績表竟然好過預期。

紅蟻資本投資經理李澤銘指,原材料成本轉嫁畀下游,多咗嘅運費有歐美買家埋單,掃除需求短缺嘅憂慮。不過,内地樓市陷冰封狀態,美國房地產交投有降溫迹象,市場對傢私嘅需求有機會減少,難免會影響敏華未來嘅銷售情況。

Alan又話,内房喺未來一、兩個月都較難回暖,而中央短期内只會解決内房流動性問題,暫時未見有迹象內地房地產政策會鬆綁,相信房地產成交會持續低迷,增加市場對敏華業績嘅憂慮。