雅虎香港電視

【Now財經台】國務院總理李克強上星期話會適時降準後，人民銀行噚日收市後就出手，宣布下周三起全面降準0.5個百分點，「放水」1.2萬億人仔，港股今日即有沖「起」效果，恒指下晝升幅擴大，升超過500點，值得留意係，今年7月宣布降準後翌日，恒指都有得彈，但好快無以為繼，今次降準對港股刺激作用有幾大？

經濟師羅家聰指，睇返過去幾次降準，其實同港股走勢都冇太大關係，降準對A股幫助應較為明顯，但好多時唔係第一時間有反應，係隔一段時間先追升，所以炒降準消息比較難。KC又話，降準只係放寬銀行貸款上限，借出嘅錢唔係特別平，刺激唔到借貸需求。