【名家給力場】房地產基金只係救爛尾樓第一浸錢?

【Now財經台】內地爛尾樓斷供潮迅速蔓延全國,迫使中央要出手化解呢場危機,市傳中央計劃成立3000億人仔嘅房地產基金,又傳出地方同房企開傾紓困措施,但爛尾總數應該冇可能只涉及3000億人仔,有可能係數以萬億計,但有指3000億人仔只起起步,實際上點執行?基金規模要幾多先足夠?

廣東省地產商會副會長尹德輝坦言,媒體及市民收到嘅風其實唔係咁啱,發生問題嘅地方只止1個,而每個地方嘅領導出手都唔同,呢3000億人仔係點嚟?可能係某啲地方已經有方案,係第一浸,因為爛尾樓唔係每棟都同期,所以唔使一次過掟幾萬億人仔落去,因為有啲樓盤已去到封頂,差少少就可以埋尾,之後就可以收埋尾數,其實發展商賣得樓花嘅,通常已投資咗一半資金,今日嘅爛尾樓,其實只係差少少錢埋尾,就算涉及過萬億人仔,都唔需要一次過倒落去,而每個地方嘅緩急先後都唔同,某啲地方已砌好呢筆錢,所以見到2000億、3000億人仔,唔代表呢個係尾數。