雅虎香港電視

【Now財經台】星島(01105)公布，執董及主要股東、佳兆業集團(01638)「太子女」郭曉亭，將約一半星島持股，賣畀公司獨立非執董、「玩具大王」蔡志明兒子蔡加讚，郭曉亭爸爸係佳兆業主席，舊年佳兆業以作價逾37億元，將屯門地皮賣畀蔡志明套現，今次輪到女兒賣部分星島持股，難免令人聯想到又係同佳兆業財困有關。

《香港股票財技密碼》作者梁杰文指，雖然近期港股市況好轉，但基本上每日仍傳出有3、4線內房股股價冧、債務違約、資金鏈斷裂等消息，對佳兆業嚟講，星島未必係一項主業，如果價錢適合，或者搵到「好歸宿」，相信都會樂意出售套現，加上今次郭曉亭只係出售少量股權，如果真係因佳兆業財困而需要套現，今次售股只會係第1步，未來可能仍會分批出售餘下持股。