【星級理財】父母沒傳授理財秘笈 黃宇詩悟上進是出路

黃宇詩的父親黃霑出名多才多藝,但當講到理財原來強差人意。黃宇詩就話,無法喺父母身上學到理財知識,因為佢哋呢方面都頗差。佢話爸爸曾經投資電影失利,投資唱片也失利,佢只能當負面教材。至於母親華娃嘅理財方面又好「家庭主婦」式,無咩教倒佢,佢唯有靠自己領悟。 之後佢講到當年入行壓力都幾大,爸爸唔喜歡佢成日提住,希望囡囡可以靠自己。而佢當年亦有啲迷失,唔知點將自己定位。入到大台一直做主持,無乜機會拍劇,佢又唔係咁鍾意,直到多年後佢先諗通,覺得口才好係天賦,能夠靠口才搵啖飯食其實都唔錯。 就咁做主持一直做咗八年,漸漸佢開始擔心自己毫無進步咁就一世,於是決心向外闖。佢希望出去學習一啲新嘅事物,唔再局限自己做幕前。佢希望做一個有經歷嘅人,憑閱歷令自己變得吸引,就好似外國一啲名人咁,所以就出咗嚟創業開內衣店。 依家黃宇詩忙舖頭嘅工作,亦會客串做主持,有時工作好忙。但佢話習慣咗「偷」時間,例如會喺坐車嘅時候寫低啲idea,靈感一到好快就可以寫好一篇文章。尤其依家有電話,做咩都好方便,好多嘢都可以偷時間處理。 最後佢分享自己嘅星級理財小貼士,就係做人要上進。佢話如果呢刻覺得自己好舒服,就係最危險嘅時候,尤其喺呢個年代,有時間應該多進修和學習,咁先唔會被淘汰。 想睇黃宇詩分享佢嘅人生經歷和所得,就要睇今集「星級理財」!