嚟到下集，葉蘊儀分享佢如何坦然踏上離婚之路。佢話千祈唔好諗，因為有小朋友而唔想離婚，因為勉強維持夫妻關係，搞到家嘈屋閉其實仲慘過離婚！而喺離婚嘅時候，夫婦亦唔應該諗一定係自己唔啱，因為一段關係根本無錯或對。 跟住佢又講到自己對愛情仲有無憧憬。佢話目前自己好享受單身，但如果有人追又合得來，佢都會俾機會自己試試。 之後佢就講自己點帶大兩個小朋友。佢話前夫有經濟資助，而佢自己開藝術學校，亦可以幫補一下，所以唔算大壓力。佢認為小朋友返學已經夠辛苦，放學做功課已經要做到好夜，所以唔會要求小朋友學呢樣學嗰樣。佢重視小朋友有無足夠時間休息和思考，著重和小朋友嘅交流和溝通，而呢啲都係同錢銀無關嘅，所以佢話養大一個小朋友其實可以不用花費太多。 雖然依家仔大女大，但係葉蘊儀話家中嘅財政大權仍然由佢掌管。佢話小朋友喺理財方面仲係有啲胡裡胡塗，試過問佢地知唔知自己上年洗咗幾多零用錢，佢地話唔知道，所以佢就開始教小朋友記錄低自己嘅洗費。佢仲鼓勵對仔女出去做兼職，非關賺錢唔賺錢事，而係想佢地明白賺錢有幾辛苦。試過個女出去做嘢返嚟呻，連厠所個阿婆都可以鬧自己，葉蘊儀就係想仔女明白，出嚟工作就係咁，想佢地碰吓釘。 最後，佢仲分享咗個理財小貼士，就係唔好俾子女太多零用錢，因為有錢唔等如可以解決所有問題。 想睇葉蘊儀分享離婚路上嘅心路歷程，同聽佢講教仔女嘅心得，就要睇今集【星級理財】喇！