今集嘉賓Cindy楊斯雅，最為人所熟悉應該係「安樂蝸」的主持，但原來佢已經無喺大台做，之後開咗間情趣用品店，仲做埋網台主持大講「性」經！ Cindy今集就分享佢創業嘅經過，原來想當年，只係老公衝口而出講咗句，叫佢不如賣性玩具，之後Cindy就認認真真咁經營起呢盤生意。佢話最初係靠IG賣貨，賣一件貨，購另一件嘅錢返嚟，所以初頭投入嘅資金唔算多。嗰時佢負責營銷，老公負責包裝和運輸，一直發展至宜家，有自己嘅實體店和店員。之後因為佢生咗對孖仔，想多啲時間留喺屋企，又因為忙於主持網台性節目，所以宜家嘅角色變咗後方支援。 之後佢被問到，賣情趣用品會唔會尷尬，佢就話一切只係語氣嘅問題，「如果語氣淫賤嘅話，成件事就會好淫賤」。佢話如果語氣正經的詢問客人需要，真心想幫客人解決問題，根本唔會尷尬。至於佢同老公會否親身試用店內出售嘅商品？佢舉例話，試過去旅行喺日本藥妝店見倒合適嘅男士清潔用品，都會買畀老公試，啱就傾代理。咁情趣用品呢？佢不諱言會試一啲比較特別嘅產品。佢仲講到「做嗰行，厭嗰行」係真會發生，但當佢哋知道一切只係壓力問題，提醒自己放鬆，問題就解決。 喺呢集最後，佢分享自己嘅「理財小貼士」，就係重開源，不節流；當唔夠錢洗嘅時候，就努力搵，因為嗰時最夠動力。 想睇楊斯雅分享佢開情趣用品店嘅經過，就要睇今集【星級理財】！