【星級理財】楊斯雅兒時賣Yes卡賺零用 現網台說性賺退休金
578,631 次觀看
楊斯雅離開大台之後轉開情趣用品店,但原來創業嘅想法喺小學時已經萌芽。佢話大概喺五、六年班嘅時候,因為好鍾意謝霆鋒,就走去「潛」Yes卡,點之有日發現樓下精品店可以成盒咁買,平均唔洗一蚊張,於是佢就成盒買返嚟,自己按明星分類,每組又加啲特別卡,例如當時好興嘅閃卡、過膠卡和夜光卡,集齊一套以高價放上Yahoo奇摩賣,就咁賺倒佢人生嘅「第一桶金」。 到大個啲嘅時候,佢好迷Kinki Kids,每次去日本旅行之前,都會喺自己開設嘅偶像網頁留言版,問有無網友要掃貨,做起代購嘅生意。譬如當時一把偶像撥扇,喺日本賣500 Yen,信和賣80蚊,佢賣60幾蚊都仲有錢賺。 到依家,佢喺網台主持性節目,目標係賺錢退休兼移民。佢話網台採會員制,收費每個月40蚊。假設由32歲做起,一直至40歲,如果能夠累積1萬個,甚至10萬個會員,收入可謂相當吸引。而佢對經營網台有無比信心,因為佢話開咪講性,最重要嘅唔係娛樂,而係令觀眾有所得著,咁呢筆錢就抵畀!而且網台可以全球性吸納會員,佢話一個月做到七位數字,就可以諗退休。 無論在公在私,楊斯雅都獨攬財政大權。喺舖頭,入貨、交租都由佢負責;喺屋企,水、電、煤由佢交不特止,連老公嘅「家用」都由佢分發。佢話男人有錢就身痕,所以唔可以畀咁多,更加話男人係要管嘅! 繼續講家庭,原來楊斯雅已經係兩子之母。佢請咗兩個工人照顧一對孖仔,因為佢覺得時間有限,一切都係講「機會成本」(opportunity cost)。如果佢選擇自己照顧家庭,就唔會有時間去處理舖頭和網台嘅事。佢寧願花多啲時間用心陪小朋友,而唔係掛住做家務,相信咁樣安排更好。 最後,佢分享自己嘅「星級理財小貼士」,就係多啲讚人,會有意想不到嘅好處。 想睇楊斯雅由細到大嘅創業經歷,睇吓佢在公在私點分配時間和金錢,唔好錯過呢集「星級理財」喇!
登入即可發佈回覆。

Yahoo有權移除任何不符 規範服務條款(包括粗俗或鼓勵犯法)之留言。

熱門商品