喬寶寶當年因「殘酷一叮」入行，觀眾對佢嘅搞笑形象相當受落，但原來搞笑背後佢相當有諗頭。佢憑藉一啲代言機會，成功遊說老闆夾份做生意，依家已經係9間生果店嘅老闆。 佢分享生果店嘅經營之道，就係唔靚唔賣。而且要包裝夠靚，先可以吸引倒客人，利潤閒閒地可以升五成至一倍。佢話最初係做批發，之後見有得做，就喺街市開零售試點，第一間落戶柴灣。最終生意愈做愈大，目前已經有9間分店。不過佢話賣生果都有風險，如果啲生果來貨唔靚，或者有延誤，佢哋都會蝕錢。 之後佢又分享自己個仔嘅投資之道。佢話有日個仔問佢，可唔可以按咗層樓，喺蘇格蘭買樓收租，因為蘇格蘭樓價平過英國成半。最終阿仔買咗個單位，租金收入$5,000，利息支出$1,000，每月淨袋$4,000。如是者依家物色緊第3個投資物業喇⋯⋯ 今集最後，喬寶寶分享返佢年輕時捱過嘅鹹苦。佢話年輕時試過應徵快餐店，但係經理話除咗洗廁所，所有崗位都夠人。最終佢接受咗offer，以$5時薪洗廁所和倒垃圾，一做就做咗半年。佢話當時連阿媽都接受唔倒佢一身難聞氣味，返到屋企要佢即刻沖涼。同事亦都對佢有所嫌棄，要佢留喺垃圾房食包、食薯條和飲汽水。但係佢對於呢啲經歷完全無怨言！ 至於佢嘅星級理財小貼士，就係覺得人要有冒險精神，而且做生意要睇長線，唔好輕易放棄。 想睇喬寶寶分享年少時如何捱苦，到今日如何創業，快啲睇今集「星級理財」！