嚟到下集，喬寶寶會講點解移民蘇格蘭，和分享夫妻相處之道。 佢話之前做懲教署，有海外教育津貼，當時去咗英國。但到個仔讀書，就去咗蘇格蘭，貪嗰度夠悶，悶到唔讀書唔得！佢話阿仔以前喺香港會買漫畫睇，但去到蘇格蘭，竟然會去買哈利波特，而阿仔喺嗰邊讀書亦進步神速，仲攞埋奬學金，慳返過百萬學費。 所以佢建議有意移民嘅家長，首選英國較北嘅地方，譬如利物浦和曼城，或者去蘇格蘭和北愛爾蘭都可以。佢話如果係為咗下一代移民，就唔好去倫敦喇，因為倫敦太多姿多采，恐怕小朋友去到都唔會專心讀書。佢仲話，應該同小朋友講多啲父母嘅奮鬥史，等佢哋知道搵食艱難；相反，唔好小朋友要乜都俾，咁樣會縱壞！ 之後佢又講到夫妻相處之道。佢話同老婆雖然係盲婚啞嫁，但相當恩愛。佢仲話睇返中國歷史，以往都係盲婚啞嫁多，離婚率仲好低。跟住佢講，好多人覺得印度男人好「大男人」，但其實大部份印度男婚後都會將存摺交俾老婆，佢都一樣。佢仲講笑話因為咁，開工時要求負責人出現金，唔介意九折出糧，因為咁先可以打斧頭。 講係咁講，其實喬寶寶好錫老婆，佢將蘇格蘭層樓寫咗老婆個名，等佢安心又放心。仲話呢啲嘢男人應該要自動自覺識做。 至於喬寶寶嘅「星級理財小貼士」，就係唔好先洗未來錢，最少要留一半錢儲起，同埋勤力一定有回報。 想睇喬寶寶點樣維繫家庭和佢嘅理財之道，快啲嚟睇呢集【星級理財】！