【胡.說樓市】2019年新地頭炮!Downtown 38鐵路概念有幾堅?

474,240 次觀看・5 年前
新地2019年頭炮盤,推出跟市建局合作的馬頭角Downtown 38,以鐵路概念做賣點,究竟呢個概念有幾堅?開則又有無蹺妙?

樓盤近七成屬面積三百零呎一房類別,繼續用厚牆身去將實用面積發水。F室301呎,跟G室304呎有三呎差距,但其實睇平面圖,內櫳空間完全相同,多出三呎只反映在厚牆身。

共提供228個單位,餘下兩房有57間。設於兩側單邊的C及H室,驟眼望落接近相同。C室377呎、H室385呎,大約有8呎差距。度平面圖,兩間睡房,以及洗手間一樣大,分別只在客飯廳。大兩房長超過6.2米,而細兩房則5.7米。

跟觀塘「凱匯」一樣,都是以鐵路做賣點。「凱匯」三分鐘行到觀塘站,「Downtown 38」去港鐵站又要幾耐?

樓盤坐落「宋皇臺站」及「土瓜灣站」之間,但位置上較接近「宋皇臺站」。如果沿「北帝街」直落,原本可以在「傲雲峰」旁的這個位置,穿過一條地底隧道直達,但奈何因發現遺跡需原址保留,需改以地面行走作替代方案。

未來會在「北帝街」及「譚臣道」增設過路設施。雖然不用繞到「馬頭涌道」才過到馬路,但全程無瓦遮頭,名副其實「好天曬,落雨淋」。而實際比起經「馬頭涌道」過馬路,只是僅縮短一百米路程,頂到盡慳兩分鐘。

然而,加建過路設施,令「啟德隧道」及「北帝街」轉出的車輛需改道,日後「九龍城道」及「宋皇臺道」的車流量會大為增加。鐵路概念最終可以兌現,只是距離跟實際情況,往往有很大出入。