雅虎香港電視

首批呎價折實要2.8萬元，三房單位最平都要接近2,000萬起步。豪宅的身價，究竟能否交出豪宅的質素？今次的驗樓單位屬新世界發展，位於北角繼園街的「柏蔚山」，詹Sir更藉機教路，驗窗嘅蹺妙，究竟點樣先要更換呢？

上到驗樓單位，長而闊的客飯廳方正實用。走出連接的露台，中層單位已可飽覽寶馬山的翠綠山景。不過享受靚景的同時，驗樓師詹濟南卻發現全屋第一個問題。抬頭一望，露台門有花痕，需要修補；行出去烏低身看看，亦發現工人操心大意的過失，因工人太大力安裝，導致鋁冚有凹痕，需要修補。

廚房附設一系列名牌爐具，詹Sir爬上枱面檢查，通風窗以至潔具無發現問題，來去水亦順利過關。走入廁所望望，來去水、鏡櫃都無出事，只是套廁有零星磁磚有孔，需要修補。兩間客房亦只見少量黃紙，頂盡只是窗框有污跡。

以為就這樣過關？咪住，入到主人房，詹Sir拿起金屬棒一敲，即發現地面出現數塊空鼓磁磚，需要更換，同時拖累「鋪磚」一項成為扣分最多的細項。

主人房設有大幅梗窗，穿過前方舊樓，可遠望至炮台山的甲級商廈。可惜玻璃窗有崩花之外，亦有少量刮花，但為何詹Sir寫上「不用換」三隻字呢？詹Sir解釋，根據中國國家質檢總局定下的標準，玻璃幕牆每平方米接受八條刮花，而花痕不能長於100毫米，而該塊玻璃只得一條刮花，且只有十多毫米，所以不需要更換，但崩了一定要更換，因會損壞玻璃強度。

驗勻全屋，大部分細項都拿到滿分，只有「鋪磚」、「批盪」、以及「窗」扣分較嚴重，最終得分91分，屬A級級別。

發展商新世界回覆指，大部分執修已經完成，但主人房玻璃因運送需時，預計有關執修會短期內完成。