雅虎香港電視

【Now財經台】美國財長耶倫嘅加息言論彈出彈入，多名聯儲局官員撲出嚟幫手「補鑊」，話依家「收水」係太早，成功令美股回穩。不過，其他央行似乎有「收水」迹象，例如巴西再大手加息，似乎做緊加息、通脹預期管理。

恒生銀行私人銀行及信託服務主管陸庭龍認為，耶倫係「講真話」，仲話投資者只聽聯儲局安撫市場嘅言論，係等同「溫水煮蛙」，又話係時候放低過去十幾年維持低息嘅市場共識。

陸庭龍預期，未來會有更多股市資金，轉戰商品、加密貨幣等另類投資。佢又話，科技股估值太高，對息口又敏感，有機會面臨調整。

佢又話，投資者想前瞻通脹情況，可留意近半年不斷破頂嘅原材料、商品價格，隨著經濟復甦，一定會影響物價，令通脹加劇。