雅虎香港電視

【Now財經台】北水暫停期間，恒生綜合指數成分股中，阿里影業(01060)表現奇差，大跌逾20%，僅次於陷財務危機嘅旭輝控股(00884)。阿里影業股價今朝再破底，跌幅達5%，曾低見0.34元。

阿里影業提供線上購買電影票服務，及為影院提供售票系統服務，向來喺內地長假期時都有憧憬同炒作。不過，今個假期就完全炒唔起，因為今年國慶檔期嘅票房唔好，據統計今年票房暫有13幾億人仔，對比上年因為有「國家主旋律」電影《長津湖》坐鎮國慶檔期，而錄得43.87億人仔票房，可以話係大為失色。

阿里影業股價9月中開始尋底，今日仍未止跌，14天RSI已落到11嘅極超賣水平，但仲未見有買盤吸納，股份係冇乜利好消息推動下都好難轉勢。