志記鎅木廠今日遭圍封 廠方稱仍有700噸木材未處理

1 年前
因新界東北發展而被收地嘅「志記鎅木廠」今日被當局圍封,並唔準任何人進入。早前政府指,最後收地期為9月13日,因此隨時會圍封,亦會賠償1400萬俾鎅木廠。 今日大批政府人員及警員到上水古洞馬草壟路圍封鎅木廠,當局拉起索帶,並貼上所有人不得進入嘅標語,人員容許一名職員入場取回文件,但其他人不得進入。 鎅木廠負責人表示,最壞打算係月尾清場,目前約有700噸木材及機器未處理,希望當局唔會銷毀。早前發展局局長甯漢豪表示,因為限期已延長多次,唔會再延遲,又稱唔會掉棄木材,用得著會俾環保處處理,亦會協助木廠搵新嘅經營地。