雅虎香港電視

九龍城老字號餅家「豪華餅店」近日店主打算結業，唔少市民趁結業前排長龍買餅，希望再一嚐豪華出品嘅蛋撻，不過，日前傳出餅店已搵到接手人，原來就係來自廖創興家族嘅廖偉芬。 豪華餅店1970年代開業，一直喺九龍城都相當有名，不過隨著區內人口老化，加上重建同埋疫情衝擊，店主打算結業，正當市民以為再見唔到老餅店後，廖偉芬宣布接手。 廖偉芬有經營精品咖啡品牌，佢表示，與豪華餅店老闆達成共識，明年會選址重開，並命名為「香港豪華餅家1977」，會保留原汁原味。佢又話，被老闆同埋員工感動，希望保留更多老字號，但由於九龍城處於重建之中，未來可能選址喺赤臘角機場重開。