雅虎香港電視

【Now財經台】市場預期，美國聯儲局下周議息後將維持息率不變，但7月會再加息，噚日澳洲、加拿大央行爆冷加息，其中，加拿大加息0.25厘至4.75厘，利率升至22年最高水平，央行話，依家嘅貨幣政策唔足以令供求回復平衡，同埋令通脹回落至2%。接連有央行繼續加息，係咪反映加息周期有排都未結束？

東亞銀行財富管理部首席投資策略師李振豪指，之前個別央行只係暫停加息，以觀察滯後效應，但之後發現通脹未有回落，所以就繼續加息。佢又提醒，央行嘅通脹目標冇參考價值，因為通脹明年都未必可以回落到2%，最終只會無止境咁加息。此外，亦要留意GDP會唔會同通脹背馳，一旦出現呢個情況，就會出現滯脹，到時加息機會就會細咗。