【專家分析】內地復常、重啟經濟留意呢個日子

【Now財經台】國常會啱啱開完,會上話要適時運用降準等貨幣政策工具,保持流動性合理充裕,又要落實政策穩住經濟,根據過往經驗,官方「出聲」後好快就有行動,加上會上特別強調第4季經濟嘅重要性,究竟嚟緊中國會唔會降準救經濟?如果人民銀行真係出手,又會係幾時?

東亞銀行財富管理部首席投資策略師李振豪認為,可留意周五、周六及周日,因為通常「出聲」後未來幾日都有機會有行動,佢又指,其實官員都有放風,話要放寬民企及國企貸款,所以降準都係正常,不過,都要有錢先可以做到,而降準就可以滿足定向降準及保交樓,其實呢啲都一直做緊,亦未必預期會做得好急好狠,始終息口太低、人仔貶值太多,會影響外貿及固投,所以降準幅度會偏細,同埋會用正、逆回購作為小型按鈕,慢慢咁放。

佢又指,依家市場觀望農曆新年前,中央會唔會處理好一啲民生事項,慢慢作為一個復常嘅開始,以及重啟經濟嘅開始。