雅虎香港電視

【Now財經台】波司登(03998)股價今日低開後，好快就倒升，仲破埋頂，一度大升近9%，高見4.97元，創新高，但主動賣盤近70%。波司登近幾日成交十分活躍，暫時成交股數逾8000萬股，較過去100日同時段平均增逾4倍。

集團後日會出全年業績，4月已經發咗盈喜，預期多賺約40%至超過16億元人仔。

睇返技術走勢，RSI仲未入超買區，MACD仍然喺牛區，快線已經升穿慢線，除咗留意業績，都要留意明年初北京舉辦冬奧，有分析已將國產羽絨服品牌，歸類為受惠股之一，要留意業績加埋炒作因素，係咪會有大行再上調波司登估值。