【股市脈搏】恒指畀「3條線」壓住難再上?

【Now財經台】港股承接上星期五嘅升勢,高開過百點,喺騰訊控股(00700)、美團(03690)及友邦保險(01299)帶動下,一度升超過200點,高見28268點,之後升幅收窄,最新升逾150點,不過,成交唔算太配合。

睇返技術走勢,恒指今朝上試10天線,即28300點水平,但對上嘅20天、50天及100天線疊埋晒,反映恒數要再升有好大阻力。

此外,睇恒指日線圖,參考返2019年6月,同樣企喺28000點樓上,出現50天線跌穿100天線嘅情況,不久大市就出現調整,由28500點跌到約24900點,調整幅度超過12%,後市要留意今次會唔會又係咁,始終上面畀幾條移動平均線壓住,阻力係非常大。