雅虎香港電視

【Now財經台】港股今日大冧，恒指一度急瀉逾1000點，插穿24000點，大市近期跌唔停，內銀股、內險股、內房股、本地地產股呢啲重災股冧價，息率就急升，面對唔同嘅政策風險，呢啲股份係咪博唔過？

成家網上投資課程導師徐冠鴻指，喺跌市仍然表現強勢嘅板塊係本地銀行股，房地產股就跑輸大市，加上呢輪跌浪未完，而恒指啱啱先跌穿之前低位，所以依家唔係撈底嘅時機，如果要撈底，諗Sir建議撈中銀香港(02388)，唔好買恒生銀行(00011)呢啲業務太過本地化嘅銀行股，至於科網股，騰訊控股(00700)仍然可以跑贏大市，所以科網股唔使睇得太淡，但暫時唔建議沾手本地地產股、內房股、濠賭股呢三個板塊。