雅虎香港電視

【Now財經台】今日係港股月結及季結日，恒生指數噚日喺20000點關口有支持，截至噚日止，港股3大指數喺第1季累升2%至3%，而北水已連續17日掃貨，噚日淨買入逾20億元。

博威環球資產管理金融首席分析師聶振邦預期，如果恒指今日收市突破3月初高位，即20600點水平，計埋今日就連續3個交易日企穩20000點樓上，後市就可以睇得樂觀啲，下個支持位睇21000點。

聶Sir分析指，噚日係期結日，恒指一度倒跌，可能有大戶壓低指數建好倉，但尾市由跌轉升已反映資金流入港股意欲頗強，加上市場已消化3月中旬美國銀行業嘅負面消息，對港股後市有正面幫助。至於阿里巴巴(09988)及京東集團(09618)傳出分拆業務在港上市嘅消息，有利中資科網股帶動大市繼續造好。