雅虎香港電視

【Now財經台】美股喺聯儲局議息後，表現一直唔好，其中一個困擾大市嘅原因係，美國政府又面對停擺危機，高盛更直指，今次停擺機會高達90%，又話市民及官方機構已做好停工準備，到底今次停擺風波影響有幾大，會唔會好似奧巴馬政府時代咁，不斷出現停工後又復工嘅情況？

東亞銀行財富管理部首席投資策略師李振豪指，民主共和兩黨係為咗明年美國總統大選造勢，呢啲戲碼會不斷上演，但佢認為，焦點其實唔係停擺，而係拜登政府嘅支出問題，過去1年，華府財政赤字十分嚴重，主要受豁免學生貸款及同補貼拖累，若透過停擺減少政府支出，過去1年嘅補貼作用就會消失，最終導致美國經濟陷入衰退。

佢續指，若美國政府喺新嘅財政年度唔再投入學生貸款項目，大部分人嘅支出及消費就會大減，各項財政指標及消費者信心會繼續轉弱，屆時拖低美股亦好正常。