雅虎香港電視

美國近日洩漏咗幾十份機密文件，有啲仲標記係「最高機密」，當中包括俄烏戰爭，更有文件包括分析中國以及印太嘅軍事情況等等。 總共有兩批文件外洩，最初喺社交平台Discord以及Telegram，之後Twitter亦有美國嘅機密文件出現，文件包括描述烏克蘭嘅軍隊訓練情況、西方軍援進度，又透露烏軍準備咗幾十個新旅反攻等等。有一批文件係關於中國、印太軍力部署，中東嘅恐怖主義等等，不過，有啲文件有修改痕跡，可能有人借機發布假訊息。 美國國防部話，機密文件外洩對國家安全構成嚴重威脅，當局拒絕評論文件真偽，但就話文件有啲信息被竄改。