雅虎香港電視

近期日本網絡瘋傳一段短片，一名高中生喺日本壽司郎一間分店狂舔豉油樽同埋茶杯，又為迴轉壽司「加料」。事件引發軒然大波，有網民表明唔敢再去壽司郎，導致公司股價大跌，市值一度蒸發近9.6億港元。 事後嗰名高中生被「起底」，佢起初仲覺得好小事，唔明點解網絡反應咁大，但事件發酵之後，佢嘅家長帶佢向壽司郎道歉，但公司表明唔接受，會堅持追究到底。 壽司郎話，事件威脅到食安問題，會嚴肅處理，事後分店已更換以及清潔所有豉油樽同埋茶杯，又話如果顧客有要求，會隨時換已消毒嘅用具。